[GAL] 1972 é un proxecto de creación-mediación no que un grupo de adolescentes de Vigo -liderados por unha espectacular troupe de profesionais das artes escénicas da zona- investigan en escena un dos episodios máis importantes da loita obreira durante o franquismo, non só na cidade olívica se non na España da época: a impresionante folga xeral de 15 días que se desenvolveu en setembro de 1972, derivada das tráxicas xornadas que acabaran coa vida de dous obreiros meses antes en Ferrol.
Durante o proceso, o grupo de adolescentes e creadores organizaranse colectivamente para ‘bailar a loita’, intentando revivir cos seus corpos e voces a enerxía e o espíritu dun episodio do noso pasado do que non quedou nin unha soa imaxe para a posteridade; nin un só vídeo.
1972 é un proxecto educativo para xente nova interesada tanto nas artes escénicas como no pasado da súa cidade. Unha formación multidisciplinar en danza contemporánea, sonoplastia, texturas audiovisuais, iluminación creativa, dramaturxia documental e creación colectiva co obxectivo de xerar un espectáculo.

[GAL] A nova estrea de ButacaZero nace como fonda homenaxe a Manuel Lourenzo, finado o pasado ano. Mestre e mentor de Xavier Castiñeira (e de tantas outras persoas que conforman o teatro galego profesional na actualidade), a súa palabra, a súa mirada e o seu compromiso coa escena seguen vivos en cada unha das nosas creacións e continúan así iluminando o camiño de novas xeracións.

A Velada de Londres mergúllanos na súa visión sobre o universo de Drácula, unha das súas obsesións creativas. Nela imaxina unha escena tras o primeiro capítulo da novela de Bram Stocker, cando Jonathan Harker coñece ao Conde en Transilvania. No retorno a Londres xunto á súa muller Mina, Jonathan revive obsesivamente aquela experiencia, e a súa relación esborrállase entre o desexo, o medo e a fascinación.

A presenza en escena de Esperanza Mara, chelista e soprano, farán que o público poida disfrutar dunha velada teatral, pero tamén musical.

A representación completarase cunha pequena exposición dedicada á vida, obra e legado de Manuel Lourenzo. Un convite a descubrir e celebrar a memoria dun creador que deixou unha pegada imborrable no teatro galego.

[GAL] Mario é un rapaz nacido na comarca do Ribeiro dos anos 50. Mais a aldea non parece un lugar demasiado apropiado para el. Non lle gusta vendimar nin mocear e non lle prestan os xogos dos adolescentes. E menos aínda pensa seguir os ditados do pai, que van en contra da súa natureza interior. Mario escapa da aldea para instalarse no Vigo industrial dos 70, buscando na cidade un lugar ideal para ser el mesmo. Pero non resulta tan sinxelo de atopar. Os aforros pouco duran, e será difícil sobrevivir nesa nova hostilidade, se non fose pola aparición dunha fada madriña: Dorín. Ela, coma el, naceu sendo un rapaz galego, pero chegou a ser unha grande artista en París. Agora actúa na Riomar de Samil e vive no Abanico, onde Mario axudará a limpar, planchar, estudará contabilidade e comezará a dubidar…mesmo do seu nome.

Sinopse Dúas titiriteiras abren un antigo baúl que podería estar no noso faiado sen nin sequera sabelo. Dentro non aparece a vaixela das nosas avoas, se non a historia silenciada de miles de mulleres rapadas durante a Guerra Civil. Entre a narración oral, o teatro documental e o de obxectos, Melón Pelado propón unha viaxe esperpéntica que xamais debería volver esconderse en ningún faiado.
Melón Pelado é o segundo proxecto escénico no que ButacaZero aborda o tema das rapadas da Posguerra Civil. Esta pequena peza nace como encargo do Museo Reina Sofía, que propón a Esther F. Carrodeguas escribir unha peza de monicreques para o catálogo da súa exposición ESPERPENTO.

[GAL] Entre Palav·bras son dúas pequenas pezas escénicas nas que ButacaZero e TEatro Ensaio cruzan o seus equipos para a xestación dun experimento escénico transnacional. Formalmente componse de dous monólogos: ‘Fracturas’, escrito e dirixido por Pedro Estorninho, que interpretará Pepa Barreiro, e ‘Ergue o cu’, escrito por Esther F. Carrodeguas con dirección de Xavier Castiñeira, que interpretará Inês Leite.
Entre Palav·bras é un proxecto de investigación que pretende afondar sobre o impacto que o teatro ten nas mudanzas sociais e civilizacionais, comprendendo o teatro como territorio. Pero sobre todo é un diálogo entre dúas plataformas de produción teatral unidas pola paixón polo teatro político pero separadas por unha fronteira tan imaxinaria como real, a que separa Galiza de Portugal.

Sinopse ‘Fracturas’: Unha muller escondida nun búnker, perdéndose e encontrándose consigo, coas súas memorias, coas súas mortes, co seu propio tempo no cárcere. Confróntase coa máis dura tarefa, non perder as palabras, non lles perder o nome. Non ficar no eterno limbo do vacío.

Sinopse ‘Ergue o cu’: Como sobreviven as vellas ideas nos novos tempos? Cal é o camiño da utopía no século XXI? De qué serve o teatro no mundo da IA? Neste MANIFESTO ROCKEIRO POLÍTICO ButacaZero pregúntase a sí mesma que é e para que serve o teatro político, nun artefacto teatral directo (pero poético) de mobilización individual (pero colectiva). Un acto de incertezas e contradicións entre as ideas e as realidades, entre o desexo e a realidade, entre a acción… e a realidade. Unha pílula escénica que nos convida a reflexionar sobre o compromiso que nos une a nós mesmas facéndonos entrar no teatro para sentar… e ERGUER O CU.

PREMIOS DE TEATRO MARÍA CASARES en 9 categorías: espectáculo, dirección, texto orixinal, actriz protagonista, actor protagonista, espazo escécnico, vestiario, espazo sonoro e dirección de movemento.

[GAL] IRIBARNE é un tipo nado na mesmísima vila de Rouco Varela (si: o cardeal) durante a Monarquía de Alfonso XIII (o primeiro promotor do cine porno en España?, si-si: ese). Emigrado a Cuba con tan só un aniño -coincidindo con inauguración da ditadura de Primo de Rivera- tras facer as Américas durante un par de anos o noso protagonista volve triunfante para ser o fillo do alcalde (e o da francesa!). Empeza o bacharel coa entrada da II República, case-case se fai cura durante a Guerra Civil pero decide liscar a Madrid -seguindo o rastro doutro galego ilustre- nada máis inaugurada a Era do Devandito (si, claro: O Caudillísimo). Con tanto afán tentou ser como o que máis pronto que tarde chegou a ser Ministro no seu mandato, a pesar de ter disparado dous días antes contra o cu da súa filla (pero que dis!? Si-si: dato real!). Sendo o primeiro e mellor opositor de España, quixo substituír ao Caudillo cando este morreu. Non puido ser: non ía por oposición. Tivo que conformarse co cargo de Vicerrei na súa querida Terra Galega.

[GAL] Papagena é unha ópera electrónica nacida a partir da figura da personaxe homónima da Frauta Máxica de Wolfgang Amadeus Mozart. Unha produción para analizar e re-escribir esta personaxe dende unha mirada actual e en base a dun dos maiores procesos de avance político-social dos últimos tempos: a loita contra o sexismo.

Unha soprano (Esperanza Mara), un barítono (Jacobo Rubianes Castelo), e un músico en escena (o propio compositor da ópera, Iago Hermo) serán os piares desta peza deseñada para chegar tanto aos grandes teatros como a aqueles espazos e vilas onde a ópera, quizais, nunca chegou.

E por suposto: en galego.

[GAL] Rapadas nace da necesidade de compartir co público a documentación recadada por Esther F. Carrodeguas sobre as mulleres rapadas na (pos)guerra civil, no seu intento por escribir unha obra de teatro. A partir destes feitos do noso pasado, a autora investiga arredor do concepto de “rapada” a nivel histórico: de Xoana de Arcos ás Femmes tondues (colaboracionistas); de Britney Spears a Jada Pinkett; de blogueiras descoñecidas a modelos internacionais. Neste camiño, Carrodeguas chega ata as mulleres que no 2022 se rapan a si mesmas en Ucraína tentando non resultar atractivas a posibles violadores durante a invasión.

[GAL] Cunha sinceridade crúa e o seu clásico humor irónico, Carrodeguas aborda neste texto de auto[NON]ficción a relación co seu corpo, marcada pola gordofobia que se respira en calquera recuncho desta apaixonante sociedade da fermosura. Porque por moito que te escondas, a gordofobia sempre está ao teu carón. Sobre todo porque está en ti.

[GAL] Mar e Xan son unha parella fóra do común, coma todas. Viven tan tranquilamente no seu pisiño de 32m². A vida pasa e o mundo xira, volta e volta, coma un filete. Pero un día, o mundo esmendréllase. O que era unha Nación convértese nunha HiberNación e hai que facer todo o que di Simón. Mar non recoñece a súa vida. Xan non recoñece á súa parella. O mundo redúcese a catro paredes e xa ninguén entende nada. 32m² é un enredo co que todo o público se poderá sentir identificado, pois todos mercamos un chisco máis de papel hixiénico do habitual e todas tivemos que acabar por levantar as nosas propias alfombras para descubrir a merda que tiñamos debaixo dos propios pés.

[GAL] Velliñas e tenra historia de Ramona, Filomena e Anabel, tres veciñas que cada día se achegan á apraza da vila para facer compaña ás pombas. Pero un bo día algo novo distrae a súa rutina: unha cuncha de vieira.

Este suceso dará pé para que as tres amigas emprendan unha aventura que as leve lonxe do seu habitual banco. Así arranca este espectáculo de rúa no que tres personaxes inesquecibles emprenden un camiño que nos permite reflexionar sobre os medos que nos impiden seguir para adiante, os obstáculos que nos atopamos cada día, e os problemas de convivencia cos que temos que lidar… nos nosos camiños!

[GAL] Despois da guerra, do exilio, da morte, do éxito, da soidade, do amor; despois de corenta anos, María Casares regresa á patria da súa infancia nunha xira teatral.

A nena medrou para converterse na gran actriz da escena e do cinema francés, no símbolo da España refuxiada, no recordo dunha Galicia perdida na brétema do pasado. Será precisamente nesa néboa onde a gran Casares deberá perderse para atopar o significado dunha vida chea de éxitos e perdas, onde as pantasmas que resoan na súa memoria axudarana a responder á verdadeira razón desta viaxe: quen é María?

Nesta peza mesturando cine en directo, teatro e música poderemos percorrer os lugares e momentos da vida de María Casares na súa viaxe de retorno tras corenta anos de exilio.

[GAL] Carolina viaxa cara aos Estados Unidos. Daiana, a bisneta dunha emigrante galega, ven da Arxentina. Comparten asento no aeroporto. Entre elas, milleiros e milleiros de #camiños.

Camiños que unen as aldeas coas ciudades. Os poemas de Rosalía coa música electrónica. O spinning co churrasco. As fotos viradas sepias coas que acabamos de colgar no Facebook.

Camiños que unen o que fomos co que desexamos ser.

[GAL] Unha Butaca. Unha Actriz. Un piano Un concerto de emocións que nos recorda que mesmo o esquecemento nos pode facer máis felices. Unha viaxe inesquecible dentro do pensamento dunha muller esquecida. Da ledicia á tristura. Do riso ao pranto. Do cotiá ao trascendente. Das luces ás sombras. Dende o amor.

[GAL] Voaxa e Carmín é unha comedia terrorífica que da voz a Maruxa e Coralia Fandiño Ricart, coñecidas como As Marías de Santiago de Compostela. Son moitas as persoas que día a día se fotografan coa estatua que as representa no paseo da Alameda, mais… saben esas persoas a crúa historia que hai detrás delas?

Voaxa e Carmín nace para lles dar voz a estas estatuas silenciadas.